ავიაკომპანია Air Astana თბილისის მიმართულებით ფრენის სიხშირეს ზრდის

19 ივნისიდან, ყაზახურმა ავიაკომპანია Air Astana-მ ალმათი- თბილისის მიმართულებით, მე-4 სიხშირე დაამატა. რეისი ყოველ სამშაბათს 97 ადგილიანი, ემბრაერ 190 ტიპის თვითმფრინავით შესრულდება, ეკონომ კლასის ორი გზის ბილეთის ღირებულება კი 266 ევროდან დაიწყება. თბილისი-ალმათის მიმართულებით ფრენის ხანგრძლივობა 3 საათსა და 35 წუთს შეადგენს.

„ის ფაქტი, რომ Air Astana-მ მე-4 სიხშირე დაამატა, იმაზე მეტყველებს, რომ ალმათი-თბილისის მიმართულება, მგზავრებში საკმაოდ პოპულარულია. დარწმუნებული ვართ, რომ რეგულარული რეისები ყაზახეთსა და საქართველოს შორის, ხელს შეუწყობს ორ ქვეყანას შორის უკვე არსებული სავაჭრო, ეკონომიკური და კულტურული ურთიერთობის კიდევ უფრო გაღრმავებას.“ - განაცხადა TAV Georgia-ს გენერალურმა მენეჯერმა, მეთე ერქალმა.

„დროის მოკლე პერიოდში, თბილისი-ალმათის რეისმა ძალიან დიდი ინტერესი მოიპოვა ჩვენს მომხმარებელში, რასაც გადაყვანილი მგზავრთა რაოდენობაც ადასტურებს. თავისი უნიკალური არქიტექტურით, თვალწარმტაცი ბუნებითა და უგემრიელესი სამზარეულოთი, საქართველო ერთ-ერთ მიმზიდველ მიმართულებად იქცა ყაზახეთისა და დსთ-ს სხვა ქვეყნების მოქალაქეებისთვის.
ჩვენ მოხარულები ვართ, რომ თბილისი-ალმათის მიმართულებით მიმავალ მგზავრებს უკვე, Skytrax -ის მიერ მონიჭებულ 4 ვარსკვლავიან მომსახურებას გავუწევთ „-განაცხადა Air Astana-ს მარკეტინგისა და გაყიდვების ვიცე პრეზიდენტმა იბრაჰიმ კანლიელმა.

ავიაკომპანია Air Astana- მ თბილისის მიმართულებით პირდაპირი რეისების განხორციელება 2011 წლის 2 ივნისიდან დაიწყო და თავდაპირველად, ფრენას ალმათი-თბილისის მიმართულებით კვირაში 3-ჯერ, ორშაბათს, ხუთშაბათს და შაბათს ახორციელებდა. 1 წლის განმავლობაში ავიაკომპანია, დაახლოებით 20.000-მდე მგზავრს მოემსახურა.