ქართული ღვინის ექსკლუზიური მაღაზია

თბილისის საერთაშორისო აეროპორტის საბაჟო გადასახადისგან თავისუფალ ვაჭრობის ზონაში „ატუ ჯორჯიას“ და „ტავ ჯორჯიას“ მიერ გაიხსნა ღვინის მაღაზია -„ქართული ღვინოები“, სადაც გამოფენილია 12 კომპანიის მიერ წარმოებული სხვადასხვა დასახელების საუკეთესო ქართული ღვინო. ქართული ღვინის ექსკლუზიური მაღაზიის გახსნა შესაძლებელი გახდა „ატუ ჯორჯიას“ და „ტავ ჯორჯიას“ აქტიური ძალისხმევისა და გარემოს დაცვისა და სოფლის მეურნეობის სამინისტროს ინიციატივით. 275 კვ.მ-ზე განთავსებულ მაღაზიაში მოწყობილია ღვინის დეგუსტაციის კუთხე, სადაც მგზავრებს მუდმივად აქვთ შესაძლებლობა, დააგემოვნონ ქართული ღვინის დახვეწილი კოლექცია 24 საათის განმავლობაში. მაღაზიის დიზაინი ქართულ ტრადიციულ სტილშია გადაწყვეტილი და ქართველ არქიტექტორს ეკუთვნის.

ქართული ღვინის მრავალფეროვანი ასორტიმენტის წარმოჩენა თბილისის აეროპორტში, სადაც ყოველდღიურად ათასობით მგზავრი იყრის თავს, არა მარტო ქართული ღვინის პოპულარიზაციას შეუწყობს ხელს, არამედ ეროვნული ღვინის ცნობადობის ამაღლებას უამრავი ვიზიტორის თვალში.

მაღაზიაში წარმოდგენილია შემდეგი კომპანიების ღვინოები: "ბადაგონი", კორპორაცია "ქართული ღვინო", შპს "ხვანჭკარა", "ქინძმარაულის მარანი", "თბილღვინო", "სარაჯიშვილი", "თელიანი ველი", "ბაგრატიონი 1882", შპს "კახეთის ტრადიციული ღვინის წარმოება", "შატო მუხრანი", მეღვინეობა "ხარება" და სხვ.