"მწვანე მომავალი" თბილისის საერთაშორისო აეროპორტში

„მწვანე მომავალი“ თბილისის საერთაშორისო აეროპორტში თბილისის და ბათუმის საერთაშორისო აეროპორტების ოპერატორი კომპანია „ტავ ჯორჯია“ საქართველოს პრემიერ მინისტრის ინიციატივას „მწვანე მომავალს“ შეურთდა და თბილისის საერთაშორისო აეროპორტში გამწვანების აქცია მოაწყო. გამწვანების აქციაში საქართველოს გარემოსა და ბუნებრივი რესურსების დაცვის სამინისტროც ჩაერთო. „ტავ ჯორჯიას“ პერსონალმა საქართველოს გარემოსა და ბუნებრივი რესურსები დაცვის სამინისტროს წარმომადგენლებთან ერთად თბილისის საერთაშორისო აეროპორტის ტერმინალის მიმდებარე ტერიტორიაზე კვიპაროსის 200მდე ნერგი დარგო. აქციის მიზანს ბუნების დაცვა, ჯანმრთელი გარემოს შექმნა და სამომავლოდ ქარდამცავი ზოლის მოწყობა წარმოადგენდა. თბილისის საერთაშორისო აეროპორტი არაერთი წელია გარემოს დაცვის პოლიტიკას ატარებს, საკუთარ ბიზნესსაქმიანობას ეთიკური და სოციალური ნორმების დაცვით ახორციელებს და პერმანენტულად იღებს გარემოს დაბინძურების აღმკვეთ ზომებს. ამას ადასტურებს ის ფაქტიც, რომ 2008 წელს ISO 14001-ის სერტიფიცირების სახით თბილისისა და ბათუმის საერთაშორისო აეროპორტებს კავკასიის რეგიონში პირველი „მწვანე აეროპორტის“ ტიტულები მიენიჭათ. ამასთანავე თბილისის საერთაშორისო აეროპორტი მრავალი წელია აქტიურად თანამშრომლობს კავკასიის გარემოსდაცვით არასამთავრობო ორგანიზაციების ქსელთანაც (CENN).